"ВЯНОК ДРУЖБЫ 2023"

З 29 па 31 сакавіка 2023 года на базе ДУА “Сярэдняя школа № 18 імя І.М. Даватара г. Гродна” пры падтрымцы ДУА “Гродзенскі абласны інстытут развіцця адукацыі” прайшоў трэці этап V адкрытага абласнога фестывалю-конкурсу беларускай музыкі “Вянок дружбы”.

Адкрыты фармат фестывалю-конкурсу дазволіў прымаць удзел салістам і ансамблям Гродзенскай вобласці і іншых рэгіёнаў Рэспублікі Беларусь (Брэсцкая, Гомельская і Мінская вобласці, г. Мінск).

Фестываль-конкурс беларускай музыкі праводзіцца з мэтай патрыятычнага духоўна-маральнага выхавання вучняў устаноў агульнай сярэдняй адукацыі. Яго правядзенне ў наш час мае выключнае значэнне,

паколькі паказвае знітаванасць пакаленняў, шанаванне сучаснікамі традыцый нашых бацькоў. Праз музыку, папулярызацыю беларускай народнай і аўтарскай музыкі навучэнцы выхоўваюцца ў духу патрыятызму і высокіх маральных прынцыпаў. Захаванне нязменнай тэматыкі, праслаўленне культуры, духоўных каштоўнасцей нашага беларускага народа з'яўляецца асноўнай ідэяй пры правядзенні фестывалю-конкурсу.

У фестывалі-конкурсе прымалі ўдзел салісты і ансамблі ўстаноў агульнай сярэдняй адукацыі, дзе арганізаваны факультатыўныя заняткі музычнай і харэаграфічнай накіраванасці. Удзельнікі фестывалю-конкурсу выканалі аўтарскія творы беларускіх кампазітараў, апрацоўкі беларускіх народных песень або танцаў, апрацоўкі на беларускія тэмы, беларускія народна-сцэнічныя або стылізаваныя танцы.

У гэтым годзе ён праводзіўся па наступных жанрах: “Інструментальная музыка”, “Вакал”, “Харэаграфія” у вочнай і дыстанцыйнай формах.

Да ўдзелу ў фінальным этапе былі дапушчаны 124 музычныя нумары з 25-ці ўстаноў адукацыі.