РАЗГЛЯДАЙЦЕ СЯМЕЙНЫ АЛЬБОМ

Разглядайце сямейны альбом,

Каляровыя мілыя здымкі

З настальгіяй, душэйным цяплом

Вочы блізкіх, усмешкі, абдымкі…

Такім шчырым і цёплым зваротам да аўдыторыі ў чытальнай зале інстытута пачалося яшчэ адно незвычайнае мерапрыемства, прысвечанае Міжнароднаму Дню сям’і. Сёння гучала паэзія на роднай беларускай мове ў выкананні аўтара, члена Саюза пісьменнікаў Беларусі і старшага выкладчыка кафедры адукацыйных тэхналогій Вікторыі Смолкі. Яна дакранулася да сэрцаў сваіх гасцей, каб адгарнуць у іх родную маляўніча-казачную старонку з успамінамі дзяцінства, бацькоўскага дома і бабулінай вёскі, дзе ўсё натолена яснай прыгажосцю і жывой верай. Прагучалі вершы, ці, як Вікторыя называе, “вершаняткі” з яе дзяцінства і нават маленства. Паэтка расказала пра сваю сям’ю як крыніцу натхнення і малую царкву, падзялілася з аўдыторыяй цікавым аповедам пра сямейныя традыцыі на Вялікдзень. Упрыгожылі сустрэчу і яркія, жывыя, як дзіцячыя ўспаміны, святочныя паштоўкі “З вершаняткавай дзюбкі”, створаныя Вікторыяй для самых маленькіх, каб яны шанавалі сваіх родных людзей і час, цудоўны, самы светлы і святы, “каля мамы, каля таты…”