РОДНАЯ МОВА ДЛЯ САМЫХ МАЛЕНЬКІХ

Выкладчыкі кафедры адукацыйных тэхналогій – кандыдат філалагічных навук, дацэнт Данута Мышко і магістр філалагічных навук, член Саюза пісьменнікаў Беларусі, паэтэса Вікторыя Смолка – распачалі шэраг цікавых, творчых, пазнавальных мерапрыемстваў, прысвечаных святкаванню Міжнароднага дня роднай мовы.

Лекцыя на роднай мове была прапанавана выхавальнікам устаноў дашкольнай адукацыі – тым, у чые надзейныя рукі бацькі давяраюць самае дарагое і цудоўнае на свеце – сваіх маленькіх дзяцей. Як пасеяць «зярнятка хараства» ў адкрытае для ўсяго новага сэрца дзіцяці, як пазнаёміць іх з першымі словамі-разынкамі на роднай мове, каб малечы адчулі «смак, колер, пах» беларускага слова, прынялі і палюбілі яго? І, нарэшце, што патрэбна сапраўднаму педагогу сёння, каб не згубіць творчага жадання развіваць «дабрадуманне і добрамаўленне» ў самых маленькіх, так спяшацца насустрач да іх з усёй сваёй педагічнай і чалавечай любоўю, як раіў вядомы Шалва Аманашвілі? Гэтыя і многія іншыя пытанні натхнялі аўдыторыю на цікавыя развагі і творчыя ідэі.

Вельмі ўразілі слухачоў прыклады з выкарыстаннем аўтарскіх арт-тэхналогій Вікторыі Валер’еўны «паэтычная паштоўка» і «паэтычная казка» для развіцця беларускага маўлення выхаванцаў і прынцып арт-педагагічнай гульні «Гуляйце, дзеткі, разумна гуляйце», прапанаваны яшчэ народным паэтам і педагогам-метадыстам Якубам Коласам.

Малюнак, музыка, паэзія – адным словам, творчасць з яе гульнёвай прыродай служыць для маленькіх крыніцай новых ведаў пра вялікі свет, а гульня, як самы карысны метад навучання, раскрывае ўсе бакі дзіцячай асобы, каб яны ўзаемадзейнічалі паміж сабой і выступалі ў гарманічным адзінстве, асновай якому з’яўляецца мілагучная беларуская мова!