«РАЗГЛЯДАЙЦЕ СЯМЕЙНЫ АЛЬБОМ…»

У межах Тыдня бацькоўскай любові выкладчык кафедры адукацыйных тэхналогій, член Саюза пісьменнікаў Беларусі Вікторыя Смолка правяла незвычайную лекцыю «Разглядайце сямейны альбом…» для слухачоў павышэння кваліфікацыі музычных кіраўнікоў устаноў дашкольнай адукацыі. Прысутныя пачулі паэзію, прыхінуліся да жывой музыкі слова з яе маляўнічымі пасланнямі маме і тату як першым настаўнікам, сям’і як самай галоўнай школе і дамашняй царкве, дзе спачатку двое, а пасля і трое сабраны ў імя Любові.

Цытаты са Свяшчэннага Пісання, разынкі народнай мудрасці, узоры з мастацкай літаратуры, культуры і гісторыі далікатна ўпляталіся ў тканку шчырай гутаркі на роднай мове і дазвалялі яшчэ больш, яшчэ глыбей намацваць сувязь паміж вядомымі агульначалавечымі скарбамі – сям’ёй, Радзімай, мовай, ведамі, прыродай, зямлёй, верай, прыгажосцю, мірам, жыццём. Аўтарскія паэтычныя паштоўкі «З вершаняткавай дзюбкі», прысвечаныя цёплым сямейным традыцыям і хрысціянскім святам, расчулілі і захапілі аўдыторыю, а майстар-клас па іх стварэнні дазволіў кожнаму здзейсніць маленькую спробу мастацтва, прыкласці свае рукі, веды, умельства, часцінку душы, каб даросламу ізноў на хвілінку стаць такім простым, чыстым, цікаўным да ўсяго новага.