ГАЛОЎНЫ АБ’ЕКТ УВАГІ – РОДНАЯ МОВА
21.02.2022Сёння ў свеце налічваецца больш за шэсць тысяч моў. Паводле ацэнак ЮНЕСКА, палова з іх знаходзіцца пад пагрозай знікнення. Менавіта дзеля іх захавання, а таксама прызнання і пашырэння выкарыстання ў 1999 годзе Генеральная Асамблея ААН падтрымала рашэнне пра абвяшчэнне Міжнароднага дня роднай мовы і заклікала дзяржавы, якія ўваходзяць у ААН і Сакратарыят ААН садзейнічаць абароне і захаванню ўсіх моў народаў свету. Рашэннем ЮНЕСКА быў абвешчаны Міжнародны дзень роднай мовы, які адзначаецца 21 лютага.
У Рэспубліцы Беларусь дзве дзяржаўныя мовы: беларуская і руская, аднак менавіта беларуская мова ўнесена ў спіс моў, якія пад пагрозай знікнення. Таму сёння галоўным аб’ектам увагі становіцца тытульная мова нацыі – беларуская.
Традыцыйна ў Гродзенскім абласным інстытуце развіцця адукацыі адбыўся Гродзенскі абласны дыктант, прысвечаны Міжнароднаму дню роднай мовы.
Мэта мерапрыемства – папулярызацыя беларускай мовы. Кожны чалавек павінен не забываць сваю мову і распаўсюджваць яе.
– Эксперты лічаць, што за апошнія некалькі год беларуская мова праяўляе даволі высокую ступень жыццёвасці, актыўна пранікае ў новыя, сучасныя сферы ўжытку, напрыклад у інтэрнэт-прастору, і гэта сведчыць пра яе рэальную запатрабаванасць, жаданне людзей ёю карыстацца. Аднак даследчыкі адзначаюць, што існуе відавочная праблема з шырокім выкарыстаннем беларускай мовы ў паўсядзённым жыцці, – падкрэсліла Святлана Сяргейка, рэктар інстытута.
У 2022 годзе, вызначаным у нашай краіне як ГОД ГІСТАРЫЧНАЙ ПАМЯЦІ, асаблівае значэнне набывае практычнае забеспячэнне паспяховага функцыянавання беларускай мовы ва ўсіх сферах грамадскага жыцця, у якіх павінна выкарыстоўвацца дзяржаўная мова краіны і тытульная мова нацыі.
Сёння пісалі текст «Музей паэта» паводле Аляксея Кулакоўскага,прысвечаны юбілею Янкі Купалы.
Агучвала тэкст старшы выкладчык кафедры адукацыйных тэхналогій, старшыня пярвічнай прафсаюзнай арганізацыі Ірына Мякеня.
– Тэкст дыктанта не складаны, так як наша мэта не вызначыць узровень пісьменнасці, а далучыць удзельнікаў да роднага слова, бо наша мова вельмі прыгожая, вельмі мілагучная, – расказала Ірына Аляксандраўна.
Адначасова пісалі Гродзенскі абласны дыктант каля 100 чалавек. Удзел у дыктанце прынялі супрацоўнікі і слухачы павышэння кваліфікацыі інстытута, а таксама грамадскасць вобласці. Пасля таго, як тэкст быў поўнасцю агучаны, прайшла самаправерка.
Можна было заўважыць, з якой асалодай і ў той жа час з хваляваннем, кожны правяраў тэкст. Усе жадалі напісаць дыктант без памылак.
Паразмаўляўшы з удзельнікамі мерапрыества можна адзначыць, што кожны атрымаў станоўчыя і прыемныя ўражанні.
–Прымаць удзел у напісанні абласного дыктанту стала ўжо штогадовай традыцыяй. Асабіста для мяне гэта цудоўная нагода ў паўсядзённай абстаноўцы пачуць мілагучную беларускую мову і атрымаць асалоду ад слоў, што гучаць нібы песня,– сказала Наталля Гуштын, бібліятэкар інстытута.
У гэтым годзе прадугледжаны тры фарматы правядзення мерапрыемства: вочна (у лекцыйнай зале інстытута); анлайн-трансляцыя (па спасылцы); у рыжыме відэазапісу (ролік размешчаны на сайце інстытута).