З УРАЖАННЯМІ ЯРКІМІ АД СВЯТА БЕЛАРУСКАГА ПІСЬМЕНСТВА: ШАНУЙЦЕ КНІГУ ДОБРУЮ І МОВУ РОДНУЮ!

Пачатак новага навучальнага года, наблiжэнне выдатнай падзеі – Дня беларускага пiсьменства – прыемная нагода сустрэцца i адзначыць разам!

Кафедра адукацыйных тэхналогiй i старшы выкладчык кафедры, член Саюза пiсьменнiкаў Беларусi Смолка Вiкторыя Валер’еўна запрасiлi ўсiх жадаючых на лiтаратурны вернiсаж “З табою, кнiга добрая, прыйшлi ў новы век”, прымеркаваны да Дня беларускага пiсьменства. Утульная чытальная зала на гадзiну нiбы ператварылася ў казачны карабель, што па хвалях сiнявокай адправiўся ў цiкавую вандроўку па незвычайна-маляўнiчых гарадах i мястэчках Радзiмы – культурна-гістарычных цэнтрах, дзе ў розныя гады ладзiлася свята беларускай кнiгi i друку.

Каго з асветнiкаў з кнiгай у руках сустракалi на вулiцы жыхары Прынёманскага краю? Якi горад Беларусi называецца дыяментавым і чаму? Як трапiць у “Лясную школу”? I дзе знайсцi самы хуткi шлях у любiмую многiмi класiкамi “сталiцу абаранкаў”? На самыя нечаканыя пытаннi, звязаныя з гiсторыяй беларускага кнiжнага мастацтва, хутка i весела адказвалi ўдзельнікі мерапрыемства.

Усплываюць у памяцi словы вялікага Васiля Быкава. Некалi, узгадваючы сваё дзяцiнства, народны пісьменнік сказаў: “Менавiта ў раннiм узросце беларускiя кнiгi i могуць закрануць штосьцi ў душы!”