УРОК ХХІ СТАГОДДЗЯ Ў ДЗЕЯННІ: ВЫЯЗНЫ ЗАНЯТАК НА ГРОДЗЕНШЧЫНЕ

11-12 мая горад Гродна сустракаў удзельнікаў комплекснага выязнога занятку ў рамках рэалізацыі праекта “Рэспубліканская метадычная школа: урок ХХІ стагоддзя”. Арганізатарам з’яўляецца дзяржаўная ўстанова адукацыі “Акадэмія адукацыі”, суарганізатарам выступіў Гродзенскі абласны інстытут развіцця адукацыі.

Мерапрыемства ладзілася на базе ДУА “Гімназія № 10 імя Мітрапаліта Філарэта (Вахрамеева) г. Гродна” для настаўнікаў беларускай мовы і літаратуры, метадыстаў інстытутаў развіцця адукацыі, кіраўнікоў метадычных фарміраванняў па тэме «Рэалізацыя дыферэнцыраванага падыходу ў навучанні вучэбным прадметам “Беларуская мова”, “Беларуская літаратура”».

Каардынатар выязнога занятку – Чахлова Таісія Філіпаўна, метадыст упраўлення дашкольнай і агульнай сярэдняй адукацыі ДУА «Акадэмія адукацыі» – вызначыла асноўныя напрамкі працы выязнога занятку Рэспубліканскай метадычнай школы і раскрыла тэарэтычныя аспекты рэалізацыі дыферэнцыраванага падыходу ў навучанні.

У першы дзень удзельнікі пазнаёміліся з адукацыйнай прасторай гімназіі, наведалі і прааналізавалі ўрок беларускай мовы ў 7 класе па тэме “Правапiс не (ня), нi з рознымi часцiнамi мовы (паўтарэнне)”, дзе Мялешка Ірына Міхайлаўна, настаўнік беларускай мовы і літаратуры, разам са сваімі вучнямі, прадэманстравала магчымыя варыянты дыферэнцыяцыі на вучэбных занятках.

Вопытам работы па дыферэнцыяцыі ў лічбавым асяроддзі падзялілася Гальвіна Ірына Уладзіміраўна, настаўнік рускай мовы і літаратуры ДУА «Гімназія №10 імя Мітрапаліта Філарэта (Вахрамеева) г.Гродна», а вось як эфектыўна, сістэмна арганізавана дзейнасць гімназічнага музея «Беларусь Непакорлівая» прадэманстравалі вучні пад кіраўніцтвам Юдэнка Наталлі Міхайлаўны, настаўніка гісторыі і грамадазнаўства.

У другі дзень удзельнікі Рэспубліканскай метадычнай школы наведалі майстар-класс «Вучыць – дык з падыходам, або Рэалізацыя дыферэнцыраванага падыходу на ўроках беларускай мовы (на прыкладзе раздзела “Прыметнік”)», які правяла Лойша Таццяна Віктараўна, настаўнік беларускай мовы і літаратуры ДУА «Сярэдняя школа № 41 імя А.М.Кузняцова г. Гродна», дзе тэорыя спалучалася з канструяваннем элементаў педагагічнай дзейнасці.

У сваю чаргу Ушкевіч Павел Міхайлавіч, настаўнік беларускай мовы і літаратуры ДУА «Сярэдняя школа № 42 г. Гродна», расказаў як падабраць “ключ” да кожнага вучня і ператварыць праектную дзейнасць у канструктар індывідуальных траекторый на ўроках беларускай мовы і літаратуры.

Удзельнікі адзначылі практычную значнасць, глыбіню і прадметна-метадычную вартасць усіх мерапрыемстваў комплекснага выязнога занятку ў рамках рэалізацыі праекта “Рэспубліканская метадычная школа: урок ХХІ стагоддзя”.