ЛІЧБЫ НА СЭРЦЫ МАЁЙ БЕЛАРУСІ

У чаканні дня Вялiкай Перамогi, да яе слаўнага 80-годдзя ў Гродзенскім абласным інстытуце развіцця адукацыі працягваюць рэалізоўвацца разнастайныя мерапрыемствы. Так у раскладзе заняткаў слухачоў курсаў павышэння квалiфiкацыi абсалютна невыпадкова з’яўляюцца тэмы, прысвечаныя культурна-гiстарычнай спадчыне нашай Радзiмы, «не вялікай, не малой, не чырвонай, не чорнай, а белай, чыстай, якая нікога не біла, не падбівала, толькі баранілася...». I як не пагадзiцца са словамi класiка новай беларускай літаратуры? Сапраўды, паводле шматлiкiх гiстарычных звестак, беларуская зямля заставалася полем бою, арэнай для сутыкнення процiлеглых бакоў і варожых настрояў. Беларусь, як шматпакутная Плачка ці Партызанская мадонна, нараджала дзяцей нават у самых неспрыяльных для жыцця ўмовах, гадавала выдатных мiратворцаў – сыноў i дачок, здольных цаной жыцця абаранiць Радзіму Беларусь i годна прайсці праз вернасць да яе.

На бягучым тыднi старшыя выкладчыкi кафедры адукацыйных тэхналогiй Слiнко Iгар Анатольевiч i Смолка Вiкторыя Валер'еўна прадоўжылі рэалізоўваць сумесна распачаты творчы праект – заняткі ў форме круглага стала пад назвай «Лiчбы на сэрцы». Слухачам курсаў павышэння кваліфікацыі розных груп і катэгорый былі прапанаваны цікавыя і падчас нечаканыя факты з ваеннай гісторыі беларускага мастацтва і культуры. Як перад лектарамі, так і перад усімі ўдзельнікамі дыскусіі была пастаўлена адзіная мэта, а менавіта: здзейснiць культурна-гiстарычны экскурс у ваеннае мiнулае і ў творчым суладдзi падзялiцца педагагiчным вопытам выхаваўчай працы з моладдзю, намацаць найбольш паспяховыя шляхi фармавання духоўнасці і патрыятызму ў вучнёўскiм асяродку.

Нягледзячы на сур’ёзнасць і складанасць заяўленай тэмы, усё ж пры яе раскрыцці не абышлося без заданняў гульнёвага характару: на хуткасць правiльна прачытаць не традыцыйна злева направа, але справа налева беларускiя ўстойлiвыя выразы з жывога маўлення воiнаў, расшыфраваць рэбус, складзены з малюнкаў i слоў, адгадаць народную мудрасць пра захаванне міру, пазнаць па першых акордах мелодыi беларускiя ваенныя песнi, у якiх гучаць незабыўныя лiчбы-матывы: “Дзясяты батальён” з фiльма “Беларускi вакзал”, “Два полi”, “Кожны чацвёрты”, па маўклівых фрагментах пазнаць і агучыць словы герояў з дзесяці найбольш вядомых беларускіх фільмаў i т. д. Нават дарослыя людзi, з пэўным жыццёвым i прафесiйным багажом ведаў, з уласцівымі ім стрыманасцю, дысціплінаванасцю, не маглi, у прамым значэнні слова, уседзець на месцы, збавіць iмпэту, плёну, жадання, каб не адгарнуць старонку далей, не перапытаць, не ўдакладнiць яшчэ і яшчэ, не зафiксаваць у сваіх запісах, не iнтэпрэтаваць пачутае i ўбачанае – словам, не маглі застацца абыякавымі да “жывой гісторыі”, абысцi ўвагай кожны след разбiтага ворага і кожную знакавую лiчбу Перамогi, што хвалявала, хвалюе і будзе хваляваць сэрцы асветнiкаў усiх жанраў i часоў.