МАЙСТАР-КЛАС ДЛЯ МАЛАДЫХ ФІЛОЛАГАЎ ГРОДЗЕНШЧЫНЫ: ВОПЫТ «НАСТАЎНІКА ГОДА»

На базе Гродзенскага абласнога інстытута развіцця адукацыі падчас першай сесіі абласной Школы маладога педагога адбыўся практыка-арыентаваны майстар-клас для пачынаючых спецыялістаў, настаўнікаў беларускай мовы і літаратуры Гродзеншчыны. Сваім багатым педагагічным вопытам з калегамі падзяліўся настаўнік беларускай мовы і літаратуры ДУА «Сярэдняя школа № 42 г. Гродна», пераможца Рэспубліканскага конкурсу прафесійнага майстэрства «Настаўнік года Рэспублікі Беларусь − 2026» (у намінацыі «Руская мова і літаратура, беларуская мова і літаратура») Павел Міхайлавіч Ушкевіч.

На майстар-класе «Літаратуразнаўчы праект: ад задумы да ўвасаблення за 5 крокаў» маладыя спецыялісты разам з вопытным педагогам разабралі, як ператварыць звычайную работу па літаратуры ў захапляльнае даследаванне: абмеркавалі ролю праектнага навучання ў сучаснай школе; асвоілі пакрокавы алгарытм «5 П» (Праблема − Праектаванне − Пошук − Прадукт − Прэзентацыя); навучыліся спалучаць каротка-, сярэдне- і доўгатэрміновыя праекты на ўроках. На прыкладзе бессмяротнай паэмы Якуба Коласа «Новая зямля» педагогі самастойна распрацавалі мадэлі праектаў рознага ўзроўню складанасці, улічваючы жыццёвы вопыт і чытацкія інтарэсы падлеткаў.

Маладыя спецыялісты Гродзенскай вобласці атрымалі каштоўныя метадычныя парады, гатовыя алгарытмы работы і магутны зарад натхнення для ўкаранення сучасных адукацыйных тэхналогій у сваю штодзённую практыку.