“ТВАЯ ПАЧЭСНАЯ СПРАВА – ЖЫЦЦЁ АДКРЫВАЦЬ ДРУГОМУ”

Пра многіх знакамітых беларускіх жанчын, пра іх вялікі гонар і светлы доўг – настаўніцтва і мацярынства – узгадалі ў нашым інстытуце напярэдадні Дня настаўніка. Старшы выкладчык кафедры адукацыйных тэхналогій Вікторыя Смолка прапанавала ўвазе слухачоў цікавыя звесткі і ўзоры з беларускай гісторыі, культуры, мастацтва, дзе падкрэсліваецца і ўслаўляецца роля жанчыны-настаўніцы. Незвычайныя жанравыя скульптуры “Першай настаўніцы” ў Беларусі і ва ўсім свеце, запамінальныя выявы жанчыны-педагога ў кіно і на палотнах беларускіх мастакоў, вялікая колькасць яскравых вобразаў настаўніцы-маці, настаўніцы-жонкі, настаўніцы-дачкі, настаўніцы-паэтэсы, настаўніцы-героя з рэальнага жыцця і творчасці народных песняроў – бяспрэчны доказ таго, што станаўленне і развіццё жаночай адукацыі станоўча ўплывала, уплывае і будзе ўплываць на сістэму асветы і фарміраванне перадавой часткі інтэлігенцыі Беларусі.

Усім, хто, па слове паэта, стаіць “ля пачатку маладых гадоў” і чыя пачэсная справа – “жыццё адкрываць другому”, прысвячаюцца самыя шчырыя і цёплыя радкі.

Нядзеля першая кастрычніка –

Святочны дзень з вялікім клічнікам!

І сонейка ад ранку свеціць

Найлепшым людзям на планеце!

Цяпер гучаць не для адзнакі

Любові словы і падзякі,

Але ад сэрца віншаванні,

Да слёз прачулыя прызнанні

За клопат Ваш і працавітасць!

У храмах творыцца малітва

За ўсіх пасланнікаў ад Бога –

Настаўнікаў і педагогаў!

Аўтарка – Смолка Вікторыя Валер’еўна,

старшы выкладчык кафедры адукацыйных тэхналогій